Xətai rayonunda "Ümummilli Lider Heydər Əliyev – müstəqil Azərbaycan Konstitusiyasının müəllifidir” mövzusunda dəyirmi masa keçirilib

Xətai rayonunda “Konstitusiya və Suverenlik İli” çərçivəsində rayon İcra Hakimiyyəti yanında İctimai Şura və rayon Ağsaqqallar Şurasının birgə təşkilatçılığı ilə Ümummilli Lider Heydər Əliyevin dövlətçilik tariximizdəki müstəsna rolu, eləcə də müasir müstəqil Azərbaycan Respublikasının Konstitusiyasının hazırlanması və qəbul olunması prosesindəki əvəzsiz xidmətlərinə həsr olunmuş “Ümummilli Lider Heydər Əliyev – müstəqil Azərbaycan Konstitusiyasının müəllifidir” mövzusunda dəyirmi masa keçirilib.

Tədbirdə şəhid ailələri, rayonun ağsaqqalları, ictimaiyyət nümayəndələri, ziyalılar iştirak ediblər.

Tədbiri giriş sözü ilə açan Xətai rayonu Ağsaqqallar Şurasının sədri, şəhid atası Mürvət Əsgərov bildirib ki, 1995-ci ildə qəbul edilən ümumxalq Konstitusiyası müstəqil Azərbaycan dövlətinin inkişaf yolunu müəyyən edən əsas hüquqi-siyasi sənəddir. O vurğulayıb ki, bu tarixi sənədin hazırlanması bilavasitə Ulu Öndər Heydər Əliyevin uzaqgörənliyi, zəngin dövlətçilik təcrübəsi və dərin siyasi iradəsinin nəticəsidir.

Digər çıxış edənlər – şəhid atası Meyvəddin Ramaldanov, Ağsaqqallar Şurasının üzvü Nizami Hüseynov, Mirvari Dilbazi İctimai Birliyinin sədri Güllü Tomarlı, şəhid anası Mətanət Quliyeva qeyd ediblər ki, Heydər Əliyev Konstitusiya Komissiyasına rəhbərlik edərək ölkəmizi yeni inkişaf mərhələsinə daşıyan möhkəm hüquqi baza yaradıb. Müstəqil Azərbaycanın dövlət idarəçiliyini, vətəndaşların hüquq və azadlıqlarını təmin edən əsas prinsiplər məhz Ulu Öndərin təşəbbüsü ilə Konstitusiyada təsbit olunub. Konstitusiyanın qəbulu Azərbaycanın müstəqilliyinin siyasi-hüquqi əsaslarını möhkəmləndirərək ölkəmizin sabit və davamlı inkişafına yol açıb. Bildirilib ki, Heydər Əliyevin müəllifi olduğu Konstitusiya milli dövlətçiliyimizin əsas sütunlarından biridir və bu sənəd bu gün də ölkənin hüquqi inkişafında mühüm rol oynayır.

Tədbirdə şair Vaqif Osmanlı Ümummilli Lider Heydər Əliyevə həsr olunmuş kitablarını iştirakçılara təqdim edib.

Daha sonra tədbir iştirakçıları mövzu ətrafında fikir mübadiləsi aparıblar. Çıxışlarda Ulu Öndər Heydər Əliyevin zəngin dövlətçilik irsinin bu gün də Azərbaycanın inkişaf istiqamətlərinə işıq tutduğu xüsusi olaraq qeyd olunub. Şəhid ailələri və ağsaqqallar Prezident İlham Əliyevin rəhbərliyi ilə Heydər Əliyev ideyalarının uğurla davam etdirildiyini diqqətə çatdırıblar.