Xətai rayonunda mədəniyyət müəssisələrində məişət zorakılığı mövzusunda silsilə tədbirlər keçirilib
Xətai Rayon İcra Hakimiyyətinin və Mədəniyyət Nazirliyinin birgə təşəbbüsü ilə rayonun mədəniyyət müəssisələrində məişət zorakılığı ilə mübarizəyə həsr olunmuş silsilə tədbirlər keçirilib.
Tədbirlərin məqsədi ailə dəyərlərinin qorunması, zorakılığın qarşısının alınması və bu istiqamətdə ictimai maarifləndirmənin gücləndirilməsi olub.
Rayon Mədəniyyət Mərkəzində, kitabxanalarda və klublarda təşkil olunan görüşlərdə psixoloqlar, hüquqşünaslar və ictimai fəallar məişət zorakılığının formaları, səbəbləri və onun qarşısının alınması yolları barədə çıxış ediblər. Qadınlara və gənclərə hüquqlarını tanımaq, zorakılıq halları ilə rastlaşdıqda müvafiq dövlət orqanlarına müraciət qaydaları haqqında ətraflı məlumat verilib.
Tədbirlər çərçivəsində “Zorakılığa yox deyək!”, “Ailədə harmoniya və hörmət” kimi mövzularda film nümayişləri, kitab sərgiləri və diskussiyalar da təşkil olunub.
Silsilə tədbirlərin yekununda iştirakçılara maarifləndirici bukletlər paylanıb, həmçinin məişət zorakılığına qarşı ictimai həmrəyliyin vacibliyi vurğulanıb.
