Əhmədli qəsəbə inzibati ərazi dairəsi üzrə nümayəndəliyin 2013-cü il ərzində görülmüş işlər haqqında

30.01.2014-cü il tarixdə 64 saylı tam orta məktəbin akt zalında Xətai  rayon  İcra Hakimiyyətinin Başçısı Razim Məmmədovun, hüquq-mühafizə orqanlarının,  xidmət rəhbərlərinin, təhsil, səhiyyə və mədəniyyət işçilərinin, iş adamlarının, ziyalıların, ağsaqqalların, Xətai Bələdiyyəsi üzvlərinin  və sakinlərinin  iştirakı ilə  Əhmədli  qəsəbə  inzibati   ərazi  dirəsi  üzrə  nümayəndəliyin  2013-cü ilin yekunlarına dair hesabat yığıncağı keçirilmişdir. Toplantıda Əhmədli  qəsəbə  inzibati   ərazi  dairəsi  üzrə  nümayəndə  Füzuli Ələsgərovun hesabat məruzəsi dinlənilmişdir.
Məruzədə bildirilmişdir ki, Əhmədli  qəsəbə  nümayəndəliyi  2013-cü ildə  fəaliyyətini “Yerli  icra  hakimiyyətləri  haqqında  Əsasnamə”yə  uyğun  olaraq  hazırlanmış  və  rayon  İcra  Hakimiyyəti  başçısı  tərəfindən  təsdiq  edilmiş  Əsasnamə   ilə  verilmiş  vəzifə  və  səlahiyyətlər  çərçivəsində  davam  etdirmişdir.
Hesabat   dövründə  qəsəbə ərazisində küçələrə,  dalan  və  döngələrə 100.000 kv.m-ə yaxın  asfalt  vurulmuşdur. Qəsəbənin  qalan  küçələrinə  asfalt  vurulması  ilə  əlaqədar  hazırlıq  məqsədilə  su  və  kanalizasiya  xəttləri  qaydaya  salınır.  Konkret  olaraq  Balaxan  Süleymanov  küçəsində  L-30 m, Şahin  Səmədov  küçəsində  L-320m, D-200mm  olan mərkəzi  kanalizasiya  xəttləri  yenisi  ilə  əvəz  olunmuş  və  qəsəbədə  bütün  kanalizasiya  xəttləri  xüsusi  təyinatlı  maşınla  yüksək  təzyiqlə  yuyulmuşdur  ki, nəticədə  xətlərdə tez-tez  tutulma  halları  aradan  qaldırılmışdır.
Qısa  müddət  ərzində  7-ci  Əhmədli, Seyid  Mirhəsənağa və Balaxan Süleymanov   küçələri   işıqlandırılmış   və  digər küçələrdəki    işıqlar bərpa edilmişdir.
Hesabat  dövründə  Dövlət  Proqramına  uyğun  olaraq  qəsəbənin  Balaxan  Süleymanov, Şahin  Səmədov, 5-ci  və  9-cu  Əhmədli, 3-cü  Qəsəbə  küçələrinə  ümumi  uzunluğu  5800 p/m  olan  müxtəlif  diametrli  yeni  qaz  xətti  çəkilmişdir. Bunlarla  yanaşı  qəsəbədə  mövcud  mexaniki  sayğaclar  «Smart-kart»  tipli  elektron  qaz  sayğacları  ilə  əvəz  olunmuşdur.  Sayğaclaşma  hazırda  99,9%  təşkil  edir. Şahin  Səmədov  küçəsində  qaz  xəttində  bir  ədəd  qaz  tənzinləyici  və  D=50 mm  olan  bir  ədəd  siyirtmə  quraşdırılmışdır. Hesabat  dövründə  3700  abonentə  xidmət  göstərilmişdir.
Əhmədli  qəsəbəsinin  elektrik  təchizatının  yaxşılaşdırılması  məqsədilə  konkret  tədbirlər  nəzərdə  tutulmuş  və  həyata  keçirilmişdir. Bu məqsədlə Ş. Səmədov küçəsində yeni transformator məntəqəsi tikilmiş, avadanlıqlar quraşdırılmış, hazırda transformator məntəqəsinə kabel xəttinin çəkilişi aparılır. Görülmüş  işlər  tam başa çatdırıldıqdan sonra qəsəbə  sakinlərinin  elektrik  enerjisi  ilə  dayanıqlı  və  fasiləsiz  təchizatı  tam yaxşılaşdırılacaq,  elektrik  enerjisinə  qənaət  ediləcəkdir. Hal-hazırda  qəsəbədə  bu sahədə görülmüş  işlər  nəticəsində  demək  olar  ki, elektrik  təchizatı  sahəsində  heç  bir  problem  qalmamışdır.
Rabitə  sahəsində  qeyd  etmək  yerinə  düşərdi ki, qəsəbədə  bütün  abonentlərdə   telefon  nömrələri  elektron  sistemə  keçirilmişdir.
Qəsəbənin  məişət  tullantıları  rayon  MKTB-yi  tərəfindən  daşınır. Məişət  tullantılarının  daşınması  ilə  əlaqədar  bağlanmış  müqavilələrin  sayı, əhalidən  də obyektlərdən  toplanan  vəsait  hesabat  ilində  nəzərə  çarpacaq  dərəcədə  artmışdır. Bu istiqamətdə  aparılan  işlər  ardıcıl  olaraq  davam  etdirilir. Ayrı-ayrı  ünvanlarda  yerləşən  məişət  tullantılarının  meydançaları  və  konteynerlər  mütamadi  olaraq  təmir  edilərək  rənglənir və hesabat ilində M. Hadi, A. Ələsgər  və digər küçələrində gündəlik tələbatı ödəyən yeni konteyner meydançaları tikilib  istifadəyə verilmişdir. Hesabat ilində qəsəbə ərazisində qeyri-qanuni yaranmış zibil meydançaları ləğv edilmiş və tərəfimizdən xüsusi maşınla evlərdən məişət tullantıları daşınmaqdadır.
1941-1945-ci  illərdə müharibədə həlak  olan  qəsəbə  sakinlərinin xatirəsinə  həsr  olunmuş  abidə  kompleksi tamamilə  yenidən  qurulmuşdur.  Qəsəbədə   Böyük  Vətən  müharibəsində  həlak  olan  qəsəbə  sakinlərinin  xatirəsinə  ucaldılmış «Naməlum  əsgər»  abidə  kompleksində  və  onun  ətrafında  əsaslı  təmir-bərpa  işləri  aparılmış, bu  ərazi   tamamilə  abadlaşdırılaraq  istirahət  parkına  çevrilmişdir.
Ötən  müddət  ərzində  hərbi  xidmətə  çağırışla  əlaqədar  qəsəbə  nümayəndəliyi  tərəfindən  rayon  Hərbi  Komisarlığına  yaxından  köməklik  göstərilmiş  və  görülmüş  tədbirlərin  nəticəsidir  ki, 2013-cü  ildə  qəsəbə  ərazisində  hərbi  xidmətdən  yayınan   olmamışdır.
“Ahıllara” sosail xidmət haqqında Qanunun icrası ilə əlaqədar olaraq hazırda Əhmədli qəsəbəsi ərazisində yaşayan 28 nəfər tənha, ahıl, kimsəsiz və əlil vətəndaşa mərkəzin 4 nəfər sosial xidmət  işçisi tərəfindən evlərində sosial xidmət göstərilir.
Əhmədli  qəsəbəsinin sahəsi  108  hektar, əhalisi  faktiki 15000  nəfərdən  artıqdır. Qəsəbədə  381  nəfər  olmaqla  70  məcburi  köçkün  ailəsi  məskünlaşmışdır.
Hal-hazırda Əhmədli  qəsəbəsində  14 saylı  şəhər  xəstəxana poliklinikası, Zakir  Əhmədov  adına  64  saylı  orta  məktəb, 5  saylı  peşə  liseyi, humanitar  fənlər  təmayüllü  məktəb-lisey,  Vəli  Məmmədov  adına  Mədəniyyət  evi, Əhmədli   məscidi,  poçt, 120  yerlik  335  saylı  uşaq  bağçası  və  digər  müxtəlif  təyinatlı  dövlət  və  özəl  təşkilatlar  fəaliyyət  göstərirlər.
Ölkə  Başçısı  tərəfindən  qəbul  olunmuş  Dövlət  Proqramlarının  icrası  nəticəsində  Aşıq  Ələsgər  küçəsində Bakı  şəhərini  çörəklə  təmin  edə  biləcək  gücündə  müasir  texnoloğiyalara  uyğun  olaraq “Çörək”  zavodu tikilib istifadəyə verilmişdir.
Hesabat  ili  ərzində  Əhmədli  qəsəbə  nümayəndəliyi  tərəfindən  rayon  İcra  Hakimiyyətindən  və  digər  orqanlardan, həmçinin  ayrı-ayrı  vətəndaşlardan  daxil  olmuş  yazılı  və  şifahi  müraciətlər  araşdırılmış  və  qanunauyğun  cavablandırılmışdır. 2013-cü ildə  qəsəbə  nümayəndəliyinə  sakinlər  tərəfindən  45   ərizə  və  51  məktub  daxil  olmuşdur. Onlara  vaxtında  baxılıb  və  müvafiq  tədbirlər  görülmüşdür. Bununla  yanaşı  il  ərzində  122  vətəndaş nümayəndəlikdə  qəbulda  olmuş, onlara  müraciətlərinə  uyğun  olaraq  lazımı  köməkliklər  göstərilmiş  və  qəsəbə  nümayəndəliyinə  aidiyyatı  olmayan   müraciətlərlə  bağlı  müvafiq  izahatlar  verilmişdir.
Hesabat dövründə qəsəbənin  giriş qapısı  sökülmüş, qəsəbə qəbirstanlığının ətrafına çəkilmiş daş  hasarları  hündürləşdirilmiş, müasir üslubda təmir edilərək rənglənməsi,  abidənin  ətraf  ərazisi  yenidən qurulmuşdur.
Qəsəbənin sürətli inkişafı bu gün yeni komunikasiya xətlərinin tikintisinin aparılmasını, xüsusilə də 5 km-dək kanalizasiya şəbəkəsinin qurulmasını, 4 km-dək məhəllə daxili mövcud su kəmərinin iri diametrli boru  ilə əvəz olunmasını, məhəllə daxili 10 km-dək  yolların və küçələrin yenidən qurulmasını və asfaltlanmasını, Nobel prospekti istiqamətindən Kazımağa Kərimov küçəsi boyunca 5 km yolun yenidən tikilməsi işlərinin başa çatdırılmasına ehtiyac yaradır.
Digər vacib məsələ isə qəsəbənin və Təcrübə-Sınaq zavodunun kanalizasiya problemini birdəfəlik həlldir. Bunun üçün D=400 mm, L=1200 m olan yeni kanalizasiya xətti çəkilməlidir ki, bu da qəsəbənin ehtiyaclarını ödəməklə yanaşı həm də bu ərazidən keçən dəmir yolu xəttinin   təhlükəsiz və etibarlı işləməsinə səbəb olcaqdır.
Tədbirin sonunda rayon Icra hakimiyyətinin başçısı R.Məmmədov Əhmədli qəsəbə nümayəndəliyinin fəaliyyətindən danışmış, tövsiyyə və tapşırıqlar vermiş, xidmət sahələrinin rəhbərlərinə ərazidə sakinlər tərəfində qaldırılmış problemlərin vaxtında və operativ həllini təmin edilməsi üçün müvafiq tədbirlər görməsini tapşırmışdır. Hesabatın sonunda Azərbaycan Respublikasının Prezidenti cənab İlham Əliyevə müraciət qəbul edilmişdir.