194 saylı məktəbdə “Gücümüz həmrəylikdədir” adlı tədbir keçirilib
15.12.2023-cü il tarixində Xətai Rayon İcra Hakimiyyəti, Dini Qurumlarla iş üzrə Dövlət komitəsinin təşkilatçılıgı ilə 194 nömrəli tam orta məktəbdə “Gücümüz həmrəylikdədir” adlı tədbir keçirilib.
Tədbirdə rayon İcra Hakimiyyətinin İctimai-Siyasi və Humanitar Məsələlər şöbəsinin müdiri Pənah İmanov, Dini Qurumlarla iş üzrə Dövlət komitəsinin nümayəndəsi Nuru İmanov, Xətai rayon Bələdiyyəsinin sədr müavini Nərminə Hacıyeva, Xətai Rayon Ağsaqqallar Şurasının sədr müavini, şəhid atası Meyvəddin Ramaldanov və məktəb kollektivi iştirak edib.
Tədbirdə qeyd olunub ki, dünya Azərbaycanlılarının Həmrəylik Günü respublikamızda ən xoş amal və duyğularla keçirilir. Azərbaycançılıq ideyası bitkin ideologiya kimi məhz müstəqillik dövründə Heydər Əliyev tərəfindən formalaşdırılmışdır. Ulu öndərin hakimiyyətə tarixi qayıdışı bütün sahələrdə olduğu kimi, diaspor quruculuğu və dünya azərbaycanlılarının həmrəyliyi istiqamətində də yeni vəzifələrin meydana gəlməsinə və yeni işlərin başlanmasına rəvac verdi. Dahi rəhbər böyük inamla dünya azərbaycanlılarının bir amal və bir məslək uğrunda fəal mübarizə aparması işinə başladı və bu çətin problemi öz dühasının gücü ilə uğurla həll etdi. Ulu öndər Heydər Əliyevin milli birlik və azərbaycançılıq ideyaları bu gün Azərbaycan Respublikasının Prezidenti İlham Əliyev tərəfindən uğurla davam etdirilir. Dövlətimizin başçısı dünya azərbaycanlılarının həmrəyliyinə verdiyi töhfələrlə, ölkə hüdudlarından kənarda yaşayan soydaşlarımızda milli ruhun yüksəldilməsinə çalışmaqla, bu sahədə məqsədyönlü fəaliyyətin ideoloji-siyasi konturlarını müəyyənləşdirməklə, milli birliyə xidmət edən addımları ilə bütün dünya azərbaycanlılarının dərin rəğbətini qazanmışdır. Azərbaycan Respublikası bütün dünya azərbaycanlılarının doğma ata-baba yurdudur. Odur ki, Asiyada, Avropada, Amerikada və digər qitələrdə məskən salmış soydaşlarımız Vətəndə baş verən ictimai-siyasi prosesləri diqqətlə izləyir, Prezident İlham Əliyevin rəhbərliyi ilə Azərbaycanın əldə etdiyi heyrətamiz uğurlarla fəxr edirlər.
Daha sonra məktəbin şagirdlərinin Həmrəylik günü ilə bağlı hazırladıqları ədəbi-bədii proqram nümayiş etdirildi.
