Xətai rayonunda Novruz bayramı qeyd olundu

Novruz bayramı münasibətilə martın 18-də Xətai rayonu R.Məmmədov küçəsindəki yeni açılmış parkda rayon İcra Hakimiyyəti tərəfindən bayram şənliyi təşkil olunmuşdu.Tədbirdə rayon İcra Hakimiyyətinin başçısı Razim Məmmədov, millət vəkili Hüseynbala Mirələmov, rayonun idman və bədii kollektivləri, həmçinin  rayon sakinləri  iştirak edirdilər. Parkda bayram tonqalı və  Novruz süfrəsi qurulmuş, adət-ənənələrimizi, sadə xalqın yaşantısını özündə əks etdirən guşələr yaradılmışdı. Bayram süfrəsi müxtəlif  şirniyyatlar, xonçalar, səmənilərlə bəzədilmişdi.
Rayon İcra Hakimiyyətinin  başçısı Razim Məmmədov bayram tonqalını yandıraraq, tədbir iştirakçılarının timsalında bütün Azərbaycan xalqını bayram münasibətilə  təbrik etdi, xalqımıza sülh və əmin-amanlıqla dolu bir il arzuladı.
Bayramın əsas qəhrəmanları Bahar qızı, Keçəl, Kosa və Dədə Qorqudun iştirakı tədbirə xüsusi rəng qatırdı. Milli geyimlərdə olan qadınlar qonaqlara sacda bişirilən yuxa və oradaca hazırladıqları ətirli  plov təqdim edirdilər.. Rayonun istedadlı  gəncləri müxtəlif idman növlərində öz məharətlərini nümayiş etdirirdilər. Novruz tədbiri tanınmış mügənnilərin ifaları və rəqs kollektivlərinin  iştirakı ilə sona çatdı.