Vətən Müharibəsi şəhidi Əbdülrza Rəfibəylinin anım günü və xatirə lövhəsinin açılış mərasimi keçirilib
04.12.2021-ci il tarixdə Xətai rayon İcra Hakimiyyətinin nümayəndələri Vətən Müharibəsi şəhidi Əbdülrza Rəfibəylinin anım günü ilə əlaqədar şəhidin məzarını ziyarət edib, xatirəsini ehtiramla yad ediblər. Daha sonra 58 nömrəli tam orta məktəbdə məktəbin məzunları olan şəhidlər – Vətən Müharibəsi şəhidi Tərlan Atakişiyevin, Ceyhun Abbasovun, Əbdülrza Rəfibəylinin və Birinci Qarabağ Savaşının şəhidi Rəşad Bağırovun xatirə lövhəsinin açılış mərasimi keçirilib.
Bu münasibətlə məktəbin həyətində keçirilən mərasimdə Xətai Rayon İcra Hakimiyyətinin başçısı Rafiq Quluyev, Yeni Azərbaycan Partiyası Xətai rayon təşkilatının sədri Vüqar Rəhimzadə, şəhid atası- Xalq Artisti Əli Nur, Əməkdar Artist Azad Şükürov, Hüquq-Mühafizə orqanlarının nümayəndələri, Vətən müharibəsi iştirakçıları və digər ictimaiyyət nümayəndələri iştirak ediblər.
Əvvəlcə şəhidlərimizin xatirəsi bir dəqiqəlik sükutla yad edildi, Hərbi Orkestrin ifasında Azərbaycan Respublikasının Dövlət Himni səsləndirildi.
Rayon İcra Hakimiyyətinin başçısı Rafiq Quluyev çıxış edərək bildirib ki, şəhidlərimiz qüdrətli Azərbaycan dövlətinin ərazi bütövlüyünün bərqərar olmasında böyük şücaət göstəriblər. Düşünürəm ki, bu məktəbdə təhsil alan şagirdlər bundan sonra şəhidlərimizin timsalında əsl vətəndaş kimi formalaşacaqlar, xalqımıza, dövlətimizə və Vətənimizə sədaqətin bir nümunəsini ortaya qoyacaqlar. Şəhidlərimiz Prezident, Müzəffər Ali Baş Komandan İlham Əliyevin rəhbərliyi ilə Azərbaycanın qəhrəmanlıq tarixini yazıblar. Bu insanlar Azərbaycanın qürurunun mövcudluğunu, varlığını, vətəndaşlarımızın necə böyük qəhrəman olduqlarını, torpağını sevdiklərini təsdiq etdilər. Şəhidlərimiz və qazilərimiz bizim üçün çox dəyərli, əzizdirlər.
YAP Xətai rayon təşkilatının sədri Vüqar Rəhimzadə mərasimdə çıxış edərək bildirib ki, məktəbin yetirmələri olan şəhidlərimiz mənfur ermənilərə qarşı şücaətlə vuruşaraq şəhid olublar. Bu xatirə lövhələrinin yaradılmasında məqsəd şəhidlərimizin əziz xatirəsinin daim anılması və xüsusən də şagirdlərimizə vətənpərvərlik hisslərinin aşılanmasıdır. Bizim hər birimiz şəhidlərimizin həyat yolunu özümüzə örnək bilməli, onların həyat və döyüş yolunu öyrənməliyik.
Digər çıxış edənlər Azərbaycanın Vətən müharibəsində qazandığı möhtəşəm Zəfərdən, şəhidlərin döyüş yolundan danışdılar, onlarla bağlı xatirələrini bölüşdülər.
Sonra şagirdlər Vətənə, şəhidlərə həsr olunan şeirlər səsləndirdilər. Şəhidlərin ruhuna dualar oxundu, xatirə lövhəsinin qarşısına əklillər, tər gül-çiçək dəstələri düzüldü.
