29 saylı məktəbdə “Fövqəladə hallarda özünü necə aparmalı” mövzusunda tədbir keçirildi

Xətai rayonunda yerləşən 29 saylı orta məktəbin akt zalında  Fövqəladə Hallar Nazirliyinin Bakı Regional Mərkəzinin təşkilatçılıği ilə “Fövqəladə hallarda özünü necə aparmalı” mövzusunda maarifləndirici tədbir keçirildi.
Tədbirdə FHN-nin Bakı Regional Mərkəzinin Xüsusi Riskli Xilasetmə, Dövlət Yanğın Nəzarəti, Dövlət Yanğından Mühafizə, Dövlət Sularda Xilasetmə və FHN Tibb Xidmətlərinin, Mülki Müdafiə qoşunlarının, rayon İcra Hakimiyyətinin,  Bakı şəhər Təcili Təxirəsalınmaz Tibbi Yardım stansiyasının əməkdaşları iştirak edirdilər.
  Rayon İcra Hakimiyyətinin şöbə müdiri Pənah İmanov çıxış edərək, rayon ərazisində fəaliyyət göstərən təhsil ocaqlarında, dövlət müəssisələrində  bu cür maarifləndirici  tədbirlərin keçirilməsinin böyük əhəmiyyəti olduğunu, baş verə biləcək təbii fəlakət, yangın və qazsızma hadisələri zamanı düzgün təxliyə, ətrafa civə dağıldıqda təhlükəsizliyin təmin edilməsi və s. məsələlərin hər kəs tərəfindən bilinməsinin vacibliyini diqqətə çatdırdı.
Nazirliyin əməkdaşları çıxışlarında tədbir iştirakçılarına fövqəladə hallar, onların təsnifatı, xüsusiyyətləri, fövqəladə hal baş verdikdə insanların davranışı, məişətdə qaz cihazlarından istifadə zamanı və ətrafa civə dağıldıqda təhlükəsizliyin təmin edilməsi və bu kimi hallarda insanların necə davranmalı olduqları, hansı tədbirləri görmələri barədə  ətraflı məlumat verdilər. Tədbir FHN-in xilasetmə tədbirlərinə həsr olunan
filmin nümayişi ilə davam etdi.
Daha sonra məktəbin həyətində   əvvəlcədən müəyyən edilmiş təlim nöqtələrində nazirliyin ayrı-ayrı qurumlarının xilasedici, yangınsöndürmə, radiasiyadan mühafizə, partlayıcı maddələrin aşkar olunması vasitələrinə baxış keçirildi.Fövqəladə hadisələr zamanı istifadə olunan xüsusi xilasetmə alət və avadanlıqlarının nümayişi , simulyasiya edilmiş partlayıcı qurğuların aşkar edilməsi və şərti yanğının söndürülməsi əməliyyatları şagirdlərin xüsusi marağına səbəb oldu.