Xətai rayonunda Çernobıl əlilləri ilə görüş keçirildi.

Xətai rayon İcra Hakimiyyətinin rəhbərliyi  YAP Xətai rayon təşkilatının inzibati binasında Çernobıl qəzasının  aradan qaldırılmasında  iştirak etmiş  rayon sakinləri ilə  görüş keçirdi.
       Görüşdə çıxış edən rayon İcra Hakimiyyəti başçısının müavini Rafiq Quliyev 7 min insanın həlak olduğu, 25 min insanın ömürlük əlil qaldığı qəza haqqında tədbir iştirakçılarına  geniş məlumat verərək bildirdi ki, 1986-cı ildə keçmiş SSRİ-nin digər respublikalarının nümayəndələri ilə birlikdə Azərbaycandan da 7 mindən çox həmvətənimiz Çernobıl qəzasının aradan qaldırılmasında iştirak etmişdir. O, həmçinin qeyd etdi ki,  ümummilli lider Heydər Əliyev bu qəzanın ləğvində iştirak  etmiş və həmin qəzadan zərər çəkmiş vətəndaşların statusu və sosial müdafiəsi haqqında xüsusi sərəncam imzalamışdır. Məhz bu sərəncamdan sonra da Çernobıl əlillərinə olan diqqət və qayğı artdı. Çernobıl qəzasının aradan qaldırılmasında iştirak edən şəxslərə olan dövlət qayğısı, onların pensiya və müavinətlərinin artırılması  ölkə başçısı İlham Əliyevin də daim diqqətindədir. Bildirildi ki, Xətai rayonunda Çernobıl qəzasının aradan qaldırılmasında iştirak etmiş 175 nəfərin 120-dən çoxu müxtəlif dərəcəli əlildir və onlara dövlət tərəfindən müəyyən edilmiş təqaüd və  müavinətlər verilir və müraciət etdikləri zaman sanatoriyalarda müalicə ilə təmin olunurlar. Son 2 il ərzində rayonda bu qəbildən olan insanlar mənzillə və avtomobili ilə təmin olunub. 100 nəfər sanatoriyaya göndərilib. Vurğulandı ki, radiasiya şüalanmasından əziyyət çəkən vətəndaşlar üçün Mingəçevir şəhərində xüsusiləşdirilmiş müalicə mərkəzinin yaradılması və Bakı şəhərində Çernobıl iştirakçıları üçün yaşayış binasının tikintisi barədə qəbul edilən qərar onlara göstərilən dövlət qayğısının  əyani göstəricisidir.
       Tədbirin sonunda Çernobıl əlillərinə maddi yardım və ərzaq bağlamaları  təqdim olundu.