Xətai rayonunda yaşıllaşdırma marafonu çərçivəsində ağacəkmə aksiyası keçirilib. Novruz bayramı çərçivəsində keçirilən aksiyada rayon sakinləri də iştirak edib
Prezident İlham Əliyevin tapşırığına əsasən, ölkədə ekoloji durumun daha da yaxşılaşdırılması, ekoloji tarazlığın qorunması istiqamətində görülən işlər Xətai rayonunda da davamlı xarakter alıb. Rayon İcra Hakimiyyəti və IDEA İctimai Birliyinin birgə təşkilatçılığı ilə həyata keçirilən silsilə tədbirlər çərçivəsində rayonun İnqilab İsmayılov küçəsində yerləşən Zeytunluq adlanan ərazisində yerləşən 15 hektarlıq yaşıllıq zolağında daha bir ağacəkmə kampaniyası keçirildi. Paytaxt Bakının ekoloji mühitinin yaxşılaşdırılması və şəhərin daha da gözəlləşdirilməsinə xidmət edən yaşıllaşdırma kampaniyasında Xətai rayon İcra Hakimiyyətinin başçısı Razim Məmmədov, millət vəkilləri H. Mirələmov, F. Muradov, rayonun idarə və təşkilatları, könüllülər, fəal gənclər, ümumilikdə 500-dən çox insaniştirak etdi. Novruz bayramı ərəfəsində yüksək fəallıq və bayram əhval-ruhiyyəsi ilə keçən yaşıllaşdırma marafonunda ərazi məişət tullantılarından təmizləndi, mövcud yaşıllıqlar sulandı, ərazidə ağac, gül və bəzək kolları əkildi. Budəfəki aksiyada müxtəlif ölkələrdən gətirilən tinglər, həmçinin çinar, zeytun, küknar, şam, söyüd ümumilikdə 800-ə yaxın ağac və dekorativ kol əkildi. Akasiya iştirakçılarını bayram münasibətilə təbrik edən rayon icra hakimiyyətinin başçısı bildirdi ki, “ümumrespublika yaşıllaşdırma marafonu” Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyevanın təşəbbüsü ilə reallaşdırılıb. Rayonda ekoloji tarazlığın bərpası, ətraf mühitin təhlükəsizliyi və insanların sağlamlığının qorunmasında mühüm rol oynayan yaşıllaşdırma aksiyalarında bundan sonra da ağac, gül və bəzək kollarının əkilməsi nəzərdə tutulur. Xətai rayonunda keçirilən növbəti aksiya isə əsl Novruz ovqatına köklənib, ağacəkmə kampaniyasının iştirakçıları uçün bayram süfrəsi açılıb, musiqiçilər, incəsənət adamları, aşıqlar musiqi nömrələri ifa etdilər.
