Xətai məktəbliləri Bakı şəhəri üzrə keçirilən 28-ci Spartakiadanın qalibi olublar

  Bakı şəhər Gənclər və İdman Baş İdarəsi və Bakı şəhər üzrə Təhsil İdarəsi tərəfindən təsdiq olunan əsasnaməyə uyğun olaraq,  2015-2016-cı illərdə paytaxt məktəbliləri arasında keçirilən 28-ci Spartakiadanın qalibləri müəyyən olunub. 6 idman növü üzrə təşkil olunan yarışlarda 11 rayonun komandası öz qüvvələrini sınayıb. Xətai məktəbliləri Spartakiadanın qalibi olublar.
Xətai rayon İcra Hakimiyyətində keçirilən bağlanış tədbirində çıxış edən  rayon İcra Hakimiyyəti Başçısının müavini Jalə Abdıyeva bildirib ki, bu gün ölkədə aparılan islahatlar idman sahəsində də özünü göstərir. Son illərdə idmançılarımızın beynəlxalq miqyaslı yarışlarda əldə etdikləri uğurlar, qazanılan nəticələr onu deməyə əsas verir ki, bu gün məhz bu sahə dövlət başçısı cənab İlham Əliyevin daim diqqət mərkəzindədir. Məktəblilər arasında keçirilən yarışlarda məqsəd ölkədə gənclərin idmana marağını artırmaq, onların asudə vaxtlarının səmərəli təşkil etməkdir.
Rayon İcra Hakimiyyəti aparatının şöbə müdiri Pənah İmanov çıxış edərək bildirib ki, son illlər Xətai rayonunda gənclərin sağlamlığının qorunması, idmanın maddi-texniki bazasının inkişafı istiqamətində mühüm işlər görülüb, uğurlar qazanılıb. Bakı şəhər məktəbliləri arasında keçirilən 28-ci spartakiadanın qalibi isə məhz Xətai rayon məktəbliləri olublar.
Bakı Şəhəri Gənclər və İdman Baş İdarəsinin rəisi Raqif Abbasov və digər çıxışçılar  Azərbaycan idmançılarının bir sıra beynəlxalq yarışlarda qazandığı uğurların, ölkənin hər yerində açılan yeni-yeni Olimpiya mərkəzlərinin, idman arenalarının, idmançılara yaradılan şəraitin əhəmiyyətini vurğulayıblar.
Tədbir çərçivəsində Çexiyanın paytaxtı Praqada azyaşlılar arasında keçirilən şahmat turnirinin qalibinə də mükafat verilib.  İdman yarışlarının yekununda 28-cı Spartakiadada qalib gələn təhsil ocaqlarının nümayəndələrinə və idmanın müxtəlif növləri üzrə keçirilən yarışlarda birinci, ikinci və üçüncü yeri tutan komandalara mükafatlar təqdim edilib.