Xətai rayon məktəblilərinin Heydər Əliyev adına Azərbaycan Ali Hərbi Məktəbə ekskursiyası təşkil olunmuşdur
25 noyabr 2016-cı il tarixdə Xətai rayon Gənclər və İdman İdarəsinin təşkilatçılığı ilə böyüməkdə olan gənc nəslin hərbi vətənpərvərlik tərbiyəsi işinin gücləndirilməsi, onların ordu həyatı ilə tanış olmalarını, hərbi xidmətə fiziki və psixoloji cəhətdən hazır olmalarını, həmçinin Azərbaycanın Silahlı Qüvvələrində xidmətin müqəddəs borc və şərəf iş olmasına inamın yaradılması, vətənpərvərlik, əqidəlilik, dözümlülük, cəsurluq, intizam və şəxsi məsuliyyət hissi kimi mənəvi keyfiyyətlərin inkişaf etdirilməsi məqsədilə rayonun 269 № li tam orta məktəbinin bir qrup şagirdinin Heydər Əliyev adına Azərbaycan Ali Hərbi Məktəbə ekskursiyası təşkil olunmuşdur.
İlk öncə ekskursiya iştirakçılarına məktəb haqqında ətraflı məlumat verildi. Bildirildi ki, Azərbaycan Ali Hərbi Məktəbi 1939-cu ildə yaradılmış və Bakı Ali Ümumqoşun Komandanlıq Məktəbi adlandırılmışdır. 1992-ci ilin may ayından Bakı Ali Ümumqoşun Komandanlıq Məktəbi Azərbaycan Respublikasının tabeçiliyinə keçmişdir. Yeni yaradılmış Respublikanın Silahlı Qüvvələrinin müxtəlif ixtisas və qoşun növləri üzrə zabit kadrları ilə komplektləşdirilməsinə ehtiyacı olduğundan məktəb Bakı Ali Birləşmiş Komandanlıq Məktəbinə (BABKM) çevrilmişdir. 1997-ci ildən etibarən Bakı Ali Birləşmiş Komandanlıq Məktəbinə qəbul və tədris müasir standartlara uyğun həyata keçirilməyə başlanmışdır. Məktəbə qəbul ilinin sentyabr ayında 17 yaşı tamam olmuş və 19 yaşına çatmamış orta təhsilli gənclər Tələbə Qəbulu üzrə Dövlət Komissiyasında riyaziyyat, fizika, Azərbaycan tarixi, Azərbaycan dili və ədəbiyyatı fənlərindən imtahan verir və Azərbaycan Respublikasının Müdafiə nazirinin təsdiq etdiyi plana əsasən yüksək ballar toplamış gənclər məktəbə qəbul edilirlər.
Qeyd olundu ki, Azərbaycan Respublikası Prezidentinin 20 avqust 2001-ci il tarixli fərmanına əsasən Bakı Ali Birləşmiş Komandanlıq Məktəbinin adı dəyişdirilib Azərbaycan Ali Hərbi Məktəbi adlandırılmışdır. Azərbaycan Respublikası Prezidentinin 10 mart 2004-cü il tarixli fərmanı ilə isə Azərbaycan Ali Hərbi Məktəbinə ümummilli liderimiz Heydər Əliyevin adı verilmişdir.
Daha sonra məktəblilər məktəbdə fəaliyyət göstərən “Quru Qoşunları”, “Hərbi Hava Qüvvələri”, “Hava Hücumundan Müdafiə” və “Hərbi Dəniz Qüvvələri” fakültələri ilə tanış oldular.
