Beynəlxalq Qadınlar Günü münasibətilə “Azərbaycan cəmiyyətində qadınlar: ənənələr və çağırışlar” mövzusunda tədbir keçirilib
Martın 6-da YAP Xətai rayon təşkilatının və Xətai rayon İcra Hakimiyyətinin birgə təşkilatçılığı ilə "Konstitusiya və Suverenlik ili" çərçivəsində 8 Mart - Beynəlxalq Qadınlar Günü münasibətilə “Azərbaycan cəmiyyətində qadınlar: ənənələr və çağırışlar” mövzusunda tədbir keçirilib.
YAP Xətai rayon təşkilatının sədri Ramil Mirzəyev əvvəlcə iştirakçıları salamlayıb və tədbiri açıq elan edib. Azərbaycan Respublikasının dövlət himni səsləndirilib və xalqımızın Ümummilli Lideri, müstəqil, müasir Azərbaycanın banisi Heydər Əliyevin və Azərbaycanın ərazi bütövlüyü uğrunda canlarından keçən şəhidlərimizin əziz xatirəsini bir dəqiqəlik sükutla yad edilib.
YAP Xətai rayon təşkilatının sədri Ramil Mirzəyev ölkəmizin ictimai siyasi həyatında fəal iştirak edən qadınların mühüm rol üstləndiklərini vurğulayıb və bildirib ki, Azərbaycanda dövlət qadın siyasətinin uğurlu inkişaf etməsi dövlət siyasətinin başlıca prinsiplərindəndir.
O qeyd edib ki, ölkəmizdə qadın hüquqlarının qorunması və onların fəallığının artırılması siyasətinin əsası Ulu Öndər Heydər Əliyev tərəfindən qoyulub. Ulu öndər Heydər Əliyev tərəfindən qoyulan dövlət-qadın, gender bərabərliyi siyasəti Prezident İlham Əliyev tərəfindən uğurla davam etdirilir. Bu gün Azərbaycan qadınları ölkənin sosial-iqtisadi və mədəni həyatında yaxından iştirak edir. Birinci vitse prezident Mehriban xanım Əliyevanın ölkənin ictimai-siyasi həyatındakı uğurlu fəaliyyəti, dövlətçiliyimiz naminə, xalqın rifahı üçün gördüyü işlər, xeyirxah əməlləri bu gün Azərbaycan qadınının nə qədər fəal olduğunu təsdiq edir.
Tədbirdə çıxış edən Xətai Rayon İcra Hakimiyyəti başçısının müavini Etibar Əhmədov, Heydər Əliyev adına liseyin direktoru Sevinc Orucova, 287 saylı “Zəkalar” liseyinin direktoru Aygün Əhmədli, Humanitar Fənlər Təmayüllü məktəb - liseyin direktoru Nəzakət Əsgərova, M.Ə.Əfəndiyev adına Xətai Tibb Mərkəzinin həkimi Səlmin Quliyeva dövlətin qadınlara diqqət və qayğısından, xanımların cəmiyyət həyatının ayrı- ayrı sahələrində, dövlət quruculuğu prosesində, parlament və icra strukturlarında, elm və mədəniyyət sahələrində xüsusi fəallığından bəhs etdilər, Azərbaycan qadınlarının gənc nəslin Vətənə, millətə sədaqət ruhda yetişdirilməsindəki rolundan danışdılar.
Sonda rayonun ictimai-siyasi həyatında xüsusi xidmətləri ilə fərqlənən qadınlara hədiyyələr və gül dəstələri təqdim edildi.
