“Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda dəyirmi masa keçirilmişdir
05 mart 2025 | 17:27
2025-ci il mart ayının 5-də YAP Xətai rayon təşkilatının qərargahında “Konstitusiya və Suverenlik ili” çərçivəsində “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda dəyirmi masa keçirilmişdir.
Xətai Rayon İcra Hakimiyyəti ilə birgə təşkil olunan tədbirdə əvvəlcə ümummilli lider Heydər Əliyevin və vətənimizin ərazi bütövlüyü uğurunda canlarından keşmiş şəhidlərimizin əziz xatirəsi 1 dəqiqəlik sükutla yad edilmişdir.
Toplantını giriş sözü ilə açan YAP Xətai rayon təşkilatının sədr müavini Vüqar Hüseynov Azərbaycan Respublikasının Konstitusiya quruluşunun tarixi barədə ətraflı məlumat verərək qeyd etmişdir ki, Azərbaycan müstəqillik əldə etdikdən sonra yeni Konstitusiyanın qəbul olunmasına zərurət yarandı. Bu məqsədlə də 1995-ci ildə ulu öndər Heydər Əliyev başda olmaqla Azərbaycan Respublikasının yeni konstitusiya layihəsini hazırlayan xüsusi komissiya yaradılmış və Konstitusiya layihəsi hazırlanaraq ümumxalq müzakirəsinə verilmişdir.
5 bölmə, 12 fəsil, 158 maddə, preambula və keçid müddəalarından ibarət olan yeni Konstitusiya 1995-ci il noyabrın 12-də ümumxalq səsverməsi yolu ilə qəbul edilmiş və 27 noyabr 1995-ci ildə ümumxalq səsverməsinin nəticələri nəşr edildiyi andan qüvvəyə minmişdir.
Sədr müavini Ulu Öndər Heydər Əliyevin 1996-cı il 1 noyabr tarixli Fərmanına əsasən hər il noyabrın 12-nin Azərbaycanda Konstitusiya Günü kimi qeyd edilməyə başlandığını da toplantı iştirakçılarının diqqətinə çatdırmışdır.
Tədbirdə çıxış edən Xətai Rayon İcra Hakimiyyətinin şöbə müdiri Pənah İmanov ulu öndər Heydər Əliyevin hələ sovetlər dövründə müstəqil Azərbaycan ideyasının reallaşdırılması üçün gördüyü işlərdən danışmış, bunun üçün iqtisadi, siyasi, hüquqi və hərbi əsaslar hazırladığı barədə ətraflı məlumat vermişdir. Xətai Rayon Ağsaqallar Şurasının sədri, şəhid atası Mürvət Əsgərov öz çıxışında ərazi bütövlüyümüzün və suverenliyimizin bərpasında, müstəqilliyimizin qorunmasıda ölkə başçısı cənab İlham Əliyevin müstəsna xidmətlərindən bəhs etmişdir. Yığıncaqda çıxış edən Xətai Rayon Ağsaqqallar Şurasının üzvü şəhid atası Meyvəddin Ramaldanov 2025-ci ilin “Konstitusiya və Suverenlik ili” elan olunmasını alqışlayaraq, ölkə vətəndaşlarını Azərbaycan Konstitusiyasına hörmətlə yanaşmağa və onun tələblərinə ciddi riayət etməyə çağırmışdır.
Tədbirdə çıxış edən digər natiqlər – Yeganə Yusifova, Xuraman Abdullayeva və Vüsalə Şərifova ümummilli liderin hüquqi dövlət quruculuğu sahəsindəki müstəsna xidmətlərindən danışaraq, onun rəhbərliyi ilə qəbul olunan müstəqil Azərbaycanın ilk Konstitusiyasını Azərbaycan dövlətçiliyinin möhkəmlənməsi istiqamətində atılan ən böyük addımlardan biri olduğunu vurğulamışlar.
Keçidlər
