Xətai Rayon İcra Hakimiyyəti yanında İctimai Şura və Ağsaqqallar Şurasının birgə təşkilatçılığı ilə tədbir keçirilib

11.12.2024- cü il tarixində  Xətai rayon İcra Hakimiyyəti yanında İctimai Şura və Ağsaqqallar Şurasının birgə təşkilatçılığı ilə tədbir keçirilib. Tədbirdə millət vəkili Pərvanə Vəliyeva, rayon İcra Hakimiyyətinin nümayəndələri, rayon Ağsaqqallar Şurasının sədri Mürvət Əsgərov, rayon ağsaqqalları, şəhid ailələri və ziyalılar iştirak ediblər.

Tədbiri giriş sözü ilə açan millət vəkili Pərvanə Vəliyeva qeyd edib ki, Ulu Öndər Heydər Əliyevin ikinci dəfə hakimiyyətə qayıdışından sonra vətəndaş cəmiyyətinin mühüm institutlarından olan Azərbaycan Ağsaqqallar Şurası ölkəmizin ictimai-siyasi həyatında fəal və davamlı iştirak etmişdir. Ümummilli Lider Heydər Əliyevin xüsusi ehtiramla yanaşdığı və çox güvəndiyi Azərbaycan ağsaqqalları ölkəmizdə ictimai-siyası sabitliyin bərqərar olmasında böyük rol oynayıb, bu gün də öz səmərəli fəaliyyətlərini uğurla davam etdirirlər. 

Çıxış edən rayon Ağsaqqallar Şurasının sədri Mürvət Əsgərov Ümummilli lider Heydər Əliyevin ağsaqqallara verdiyi yüksək qiymətdən, onları “milli-mənəvi dəyərlərimizin qızıl fondu” adlandırmasından bəhs edib, Prezident İlham Əliyevin və Birinci vitse-prezident Mehriban xanım Əliyevanın ağsaqqallarımıza və ziyalılarımıza yüksək diqqət və qayğı göstərdiyini vurğulayıb. Həmçinin, gənclərin xalqa, dövlətə sədaqət ruhunda, zərərli təsirlərdən uzaq olan sağlam əsaslar üzərində tərbiyəsi işində ağsaqqalların üzərinə mühüm vəzifə düşdüyünü bildirib.

Tədbirdə çıxış edən digər qonaqlar şəhid ailələrinin, qazilərin həmişə diqqət mərkəzində olduqlarını və ağsaqqalların da bu nəcib işlərdə yaxından iştirak etdiklərini bildiriblər. Onlar bundan sonra da ölkəmizin ictimai-siyasi və mədəni həyatında daim fəallıq göstərəcəklərini, öz gələcək fəaliyyətlərini daha da artırmaq əzmində olduqlarını qeyd ediblər.