Xətai rayonunda əmək yarmarkası keçirilmişdir.
11 mart 2025-ci il tarixində Dövlət Məşğulluq Agentliyinin Bakı Regional Məşğulluq filialı və Xətai Rayon İcra Hakimiyyətinin birgə təşkilatçılığı ilə işsiz və işaxtaran şəxslər üçün əmək yarmarkası keçirilmişdir. Əmək bazarının aktivləşdirilməsi və işsizlərin məşğulluğunun təmin edilməsi məqsədilə təşkil edilən tədbirə 31 işəgötürən qatılmış və müxtəlif peşə və ixtisaslar üzrə 264 vakansiya təklif edilmişdir.
Əmək yarmarkası işaxtaranlar üçün geniş imkanlar yaratmaqla yanaşı, işəgötürənlərə də uyğun kadrlar seçmək imkanı vermişdir. Yarmarkada müxtəlif sahələr – ticarət, sənaye, xidmət sektoru və idarəetmə üzrə vakansiyalar təqdim olunmuş, xüsusilə informasiya texnologiyaları, mühasibatlıq və satış sahələrinə böyük maraq müşahidə edilmişdir.
Tədbir çərçivəsində iştirakçılar işəgötürənlərlə birbaşa ünsiyyət quraraq vakansiyalar haqqında ətraflı məlumat əldə etmiş və ilkin müsahibələrdən keçmişlər. Həmçinin, bəzi namizədlər işə qəbul üçün ilkin razılıq əldə etmişlər.
Əmək yarmarkası yalnız vakansiyalarla məhdudlaşmamış, işaxtaranlara karyera məsləhətləri, CV yazma qaydaları və müsahibə texnikaları barədə də məlumatlar verilmişdir. Məşğulluq Agentliyinin nümayəndələri işsiz vətəndaşları dövlət məşğulluq proqramları, peşə hazırlığı və ixtisasartırma kursları barədə məlumatlandırmışlar.
Bu kimi tədbirlər işsiz şəxslərin əmək bazarına inteqrasiyasını sürətləndirmək və məşğulluq səviyyəsini artırmaq baxımından mühüm əhəmiyyət kəsb edir. İştirakçıların fikrincə, əmək yarmarkaları həm işaxtaranlar, həm də işəgötürənlər üçün səmərəli platformadır və bu təşəbbüslərin davamlı olması əmək bazarına müsbət təsir göstərəcəkdir.
