Xətai rayonunda "Uşaq hüquqları aylığı” çərçivəsində silsilə tədbirlər keçirilib
Xətai rayonunda rayon İcra Hakimiyyəti və rayon Qeydiyyat şöbəsinin birgə təşkilatçılığı ilə rayon ümumtəhsil məktəblərində "Uşaq hüquqları aylığı” çərçivəsində silsilə tədbirlər keçirilib.
Tədbirlərdə rayon İcra Hakimiyyəti və rayon Qeydiyyat Şöbəsinin nümayəndələri iştirak ediblər.
Çıxış edənlər ölkə Prezidenti İlham Əliyevin 27 dekabr 2011-ci il tarixli sərəncamı ilə təsdiq edilmiş “Azərbaycan Respublikasında İnsan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nda əhalinin müxtəlif qruplarının, o cümlədən də uşaq hüquqlarının müdafiəsi ilə bağlı təsbit olunan müddəaların uğurla həyata keçirildiyini şagirdlərin diqqətinə çatdırıblar. Bildirilib ki, 2023-cü ildə də ölkəmizin qoşulduğu BMT-in "Uşaq Hüquqları Haqqında Konvensiyası"-nın qəbul edilməsinin ildönümü ərəfəsində 20 oktyabr-20 noyabr tarixləri "Uşaq hüquqları aylığı" elan edilib. Aylığın keçirilməsində məqsəd Konvensiyanın prinsiplərinə uyğun olaraq, uşaqlara diqqətin daha da artırılması, uşaq hüquqlarının səmərəli müdafiəsi və təşviqi, həmçinin, bu sahədə məlumatlılığın artırılması, eyni zamanda da uşaqların öz hüquqlarını öyrənməsinə nail olmaqdır. Həmçinin qeyd olunub ki, “Uşaq hüquqları aylığı”nın təşkil olunmasının əsas məqsədi BMT-nin Uşaq Hüquqları Konvensiyasının qəbul olunmasının ildönümü, 20 noyabr-Ümumdünya Uşaqlar Günü ərəfəsində uşaqlara diqqətin daha da artırılması və uşaq hüquqlarının qorunması işinin yaxşılaşdırılmasından ibarətdir.
Tədbirlərdə şagirdlər tərəfindən günün mahiyyətini özündə əks etdirən bir-birindən maraqlı, rəngarəng səhnəciklər, şeirlər, musiqilər nümayiş etdirilmişdir.
